МНОГУ ЛУЃЕ СЕ ЗАГЛАВЕНИ ПОД УРНАТИНИТЕ: Во Газа загинаа над 31.000 Палестинци
Објавено во: Свет 13 Март, 2024
Во нападите во Појасот Газа од 7 октомври лани досега, загинаа 31.272 Палестинци, а 73.024 се повредени.
Многу луѓе уште се заробени под урнатините и на патиштата, бидејќи спасувачите не можат да стигнат до нив.
„Најмалку 88 луѓе загинаа, а 135 се повредени во израелските напади во последните 24 часа“, се наведува во соопштението од Министерството за здравство во енклавата.
Според податоците на Министерството, околу 72 отсто од палестинските жртви се жени и деца. По тужбата за геноцид поднесена на 26 јануари од Јужноафриканската Република, Меѓународниот суд на правдата одлучи дека Израел мора да се воздржи од какви било дејствија поврзани со убиства, напади и уништување на жителите на Појасот Газа и да ги преземе сите мерки за да спречи геноцидот.
Агенцијата на ОН за палестински бегалци (УНРВА) соопшти дека денеска е погоден еден од нејзините магацини во Рафа, град на југот на Појасот Газа и дека „голем број луѓе се повредени“.