МУЦУНСКИ ВО БРИСЕЛ: Добрососедството не е еднострана обврска, туку процес што бара почит

Добивај вести на Viber

Maкедонскиот министер за надворешни работи, Тимчо Муцунски во Брисел изјави дека добрососедството не е еднострана обврска, туку процес што бара почит и заедничка одговорност. 

Тој изјави дека за земјата е клучно да продолжи да напредува кон полноправно членство во Европската Унија(ЕУ), следејќи предвидлива пристапна траекторија, заснована на јасно утврдените пристапни критериуми и принципот на сопствени заслуги. 

Министерот нагласи дека членството во ЕУ не е само политичка амбиција, туку суштински трансформативен процес што ги става граѓаните во центарот. Тој ја истакна посветеноста на Владата кон спроведување на клучни реформи, особено во областа на владеењето на правото, правосудството, јавната администрација и економското управување.

Муцунски потсети дека државата е целосно усогласена со заедничката надворешна и безбедносна политика на ЕУ – стратегиски избор и врвен приоритет што ја демонстрира нашата посветеност на принципите и вредностите што ги застапува Унијата. Истакнувајќи ја потребата од носење одлуки што ќе постават основа за идното проширување на Унијата, тој ги и повика европратениците да продолжат проактивно да ја поддржуваат политиката на проширување, особено сега кога Европската Унија влегува во нов петгодишен институционален и легислативен циклус, кој ќе има значително влијание врз иднината на проширувањето.

Министерот додаде дека земјава е пример за почитување и заштита на правата на малцинствата, што повеќепати е потврдено од Советот на Европа и Европскиот суд за човекови права.

Бугарија бара Македонија да ги внесе Бугарите во Уставот за да не го блокираат европскиот пат на земјата.