НАЈАВЕН КАРАНТИН, ЛЕТУВАЊАТА ВО АЗИЈА И АФРИКА ЗАПОЧНАА: Занзибар и Малдивите се нудат како топ дестинации

Добивај вести на Viber

Владата воведе задолжителен карантин за граѓаните кои од Африка влегуваат во Македонија, а минатата недела беше обелоденето дека се хоспитализирани двајца сопружници од Битола коишто се вратиле од одмор во Занзибар. Тие не беа заразени со јужноафриканскиот сој, туку со британската мутација на вирусот. Сепак не се единствени кои одмарале на оваа привлечна дестинација. Домашните и регионалните туристички агенции нудат одмор во Занзибар, а сега има интерес и за летување на Малдивите. Фактор ви пренесува каков е интересот, дали се потребни тестови и каква е состојбата со коронавирусот во земјите кои сега се атрактивни за патување. Изборот дали ќе патувате секако е ваш.

Влатко Сулев од Националната асоцијација за дојдовен туризам советува граѓаните пред да изберат дестинација, да истражат каква е состојбата со коронавирусот во одредена земја.

„Во ова време на модерна технологија, секој може да одвои неколку часа и да провери дали во одредена земја има протоколи, дали се работи на тоа, колкав е бројот на заболени. На интернет има многу информации и може да се провери. Ако веќе некој ризикува, да провери колкав е тој ризик, затоа што штетата која може да се направи за семејството и општеството е огромна. Оној кој може да си дозволи да оди во Занзибар, сигурно може и да избере некоја побезбедна дестинација. Јас разбирам дека на граѓаните не им е лесно, но мора да бидат внимателни“, вели Сулев.

Тој објаснува дека и процесот на имунизација е многу важен за да една дестинација се смета за безбедна за патување. Ова важи и за нашата земја.

„Лани бевме изненадени, но сега не можеме да се вадиме на тоа дека сме изненадени. Дипломатијата ќе мора да си ја заврши домашната задача. За нас се важни странските туристи, но доколку и оваа година не дојде дијаспората, економијата ќе крахира“, додава Сулев.

Категоричен е дека  мора да се почитуваат сите протоколи пропишани од Светската здравствена организација, и за тоа соодветно да се информираат институциите, во спротивно и оваа година ќе имаме големи загуби во туризмот. Како пример ја наведува Хрватска, која лани и покрај пандемијата сепак успеа да извлече максимум од туризмот.. Во светот има и неколку островски земји каде досега нема починати од коронавирусот, а бројот на дијагностицирани ковид пациенти е сосема мал. Во Камбоџа, Доминика, Источен Тимор, Лаос, Самоа и други земји нема починати од коронавирусот.

foto freepik