Нефункционални се 9,7 % од кредитите!

Добивај вести на Viber

  Среде криза, банките покажаа пораст на добивката. Според анализата на Народната Банка банките прикажале зголемување на добивката од цели 70,8% во вториот кавартал од годинава во однос на истиот период лани. На што се должи овој раст? НБМ, но и банкарите што ги праша Фактор, посочуваат три клучни причини : 1. Зголемување на износот на ослободената исправка на вредноста. Ова, како што објаснуваат банкарите, значи дека во вториот квартал од годинава се подобрила наплатата на ризичните пласмани, односно се повеќе граѓани и компании од лоша преминале во подобра кредитна категорија, по што банките извршиле ослободување на резервациите, односно на парите што банките ги чуваат врзани во НБМ како гаранција за ризичните пласмани. 2. Повисок каматен приход. Банкарите објаснуваат дека во вториот квартал е зголемена наплатата на тековните камати за кредитите со кои располагаат граѓаните и компаниите. 3. Подобрување на оперативната ефикасност на банките. Оваа причина за пораст на банкарските добивки се објаснува со зголемената активност на банките, услугите и трансакциите на ниво на целиот банкарски ситем . Банкарите потврдуваат дека вториот квартал од годинава може да се смета за поуспешен од минатогодишниот, но остануваат на ставот дека ризиците сеуште ги ограничуваат банкарските пласмани . “Банките и натаму ги зајакнуваат кредитните критериуми. Поради ризиците и кризата и натаму се финансираат исклучиво првокласни клиенти и издржани бизнис- прокети. По отворањето на Кредитното Биро , кое води евиденција за задолженоста на клиентите, ретко која банка би се осудила да даде кредит на клиент од Б или В категорија “ коментираат банкари за Фактор. Народната Банка објави уште еден показател што треба да навести оптимизам – во вториот кавртал од годинава е регистриран пораст на кредитите кон приватниот сектор, но само симболично поместување кое не ја промени концентрацијата на ликвидност во банките. Тие и натаму располагаат со висока ликвидност, што значи дека поради ризиците, сеуште се воздржуваат од процес на поагресивно кредитирање . “Точно е дека во вториот квартал имаше зголемување на кредитните пласмани кон приватниот сектор , но во последниот период се забележува и пораст на депозитите на компаниите “ – велат од НЛБ Тутунска Банка . Според последните расположливи податоци, нефункционалите кредити во вториот квартал изнесуваат 9,7% и во однос на првиот се забележува незначително намалување. Нефункционални кредити

2012    II квaр.	9,7%
2012    I квар.	9,9%
2011	9,9%

Последните податоци на НБМ укажуваат дека вкупната кредитна активност на ниво на банкарскиот сектор е пониска од проектираната, а поради неизвесноста од должничката криза и “нишањето“ на стабилноста на Еврото , за прв пат по 2007 година, на крајот на вториот квартал од 2012та, депозитите во денари ги надминаа депозитите во девизи, зафаќајќи 50,7% од вкупната депозитна база. Според последните расположиви податоци вкупните депозити во банките достигнаа 3,8 милијарди евра додека вкупните кредити 3,5 милијарди евра. Дали банките ќе ја олабават каматната политика, дали ќе растат или ќе се зголемуваат ризичните пласмани , ќе го зголемат ли фирмите и граѓаните штедењето – сето ова зависи од трендовите во евро-зоната , која според НБМ сеуште е во зоната на ризик , со продолжена неизвесност и неповолни тенденции кај економската активност.