Нема решение за косовското ембарго, Пешевски на ТВ дуел ја вика колешката Кусари

Добивај вести на Viber

Нема решение на повидок за кризата која настана на македонско косовската граница. И двете држави не ги повлекуваат засега мерките кои доведоа до своевидна трговска војна, Косово ембаргото за македонските производи, Македонија таксите за влез на косовските граѓани. Граничниот премин Блаце останува блокиран од македонските превозници. И додека експертите се повеќе се сомневаат дека зад трговската војна стојат политички причини, македонскиот вицепремиер за економски прашања, Владимир Пешевски упари повик до косовската министерка за трговија и индустрија, Мимоза Кусари -Лила на ТВ дуел да ги соочат аргументите за да помогнат побрзо да се надмине проблемот. „Во јавноста во двете земји кружат различни информации и постојат многу различни мислења околу мотивите, врз кои се базира актуелната ситуација. Тоа предизвикува забуна и не придонесува за надминување на состојбите. На граѓаните им ја должиме вистината. Затоа Ве поканувам и повикувам на заеднички телевизиски настап, уште денес, каде што пред очите на јавноста ќе може да ги презентираме нашите аргументи“, стои во отвореното писмото од Пешевски до колешката Кусари. Според Пешевски,  телевизискиот дуел може да биде на македонската телевизија „Алсат-М“ или на која било друга што зрачи и во двете држави, а која ќе ја одбере Кусари. Истовремено и косовскиот премиер, Хашим Тачи ја задолжи министерката Кусари итно да го реши проблемот, а како што пренесе косовската телевизија, Тачи разговарал со премиерот Никола Груевски и истакнал дека состојбата набрзо ќе се нормализира. Проблемот меѓу Македонија и Косово започна пред една седмица, кога без никаква најава, а поради мерките за ограничување на увозот на брашно од Косово во Македонија, Косово стави ембарго на повеќе македонски производи. Македонската влада на ова врати со воведување текаси за косовските државјани кои влегуваат во Македонија, за потоа Косово целосно да ја спушти рампата за увоз на македонски производи.