Добивај вести на Viber
Нормандиско село со 850 жители наследи 2,5 милиони евра во хартии од вредност и имот , оставени од поранешен фризер од ова село, кој живеел многу скромно во Париз .
"Поранешниот фризер , живееше многу скромно во Париз во стан од 20 квадратни метри, на петтиот кат во зграда без лифт", раскажува градоначалникот на Сен Жермен де ла Кудер, Даниел Мари .
Фризерот Рејмон Брно му оставил на селото 2.15 милиони евра добиени од продажба на хартии од вредност и од осигурување на живот . Сумата е три пати поголема од годишниот буџет на селото. Покрај тоа, тој оставил и три куќи - две во Сен Жермен де ла Кудер и една во Теил , како и мал стан во Париз , во кој починал на 93-годишна возраст во 2012 година.
Вредноста на недвижностите е околу 350-400 000 евра .
"Тој никогаш не сакаше да се искористат овие пари и ги остави сите на местото во кое се беше родил и пораснал " , додава градоначалникот.
Жителите на селото добро го познаваат великодушниот добротвор , кој често гостувал во родното место на својот брат, кој починал пред него . И двајцата биле ергени , без деца. Единствениот услов на наследството било руралните имоти на фризерот да не бидат продадени на приватни сопственици во следните 100 години.
Градската власт ја утврдила вредноста на наследството дури во 2013 година . Со парите таа има намера да го реновира училиштето , центарот на селото и да ги реставрира наследените куќи.