„НЕВАКЦИНИРАЊЕТО Е ЗЛОБНО“: Утринава во Тетово почина 39-годишна жена, д-р Нуредини предупредува дека невакцинираните се убиваат и себе и другите
Објавено во: Македонија 28 Август, 2021
Иако за момент
помисливме дека ситуацијата барем за нијанса е подобра, сепак морам да
констатирма дека се уште нема никаква промена во однос и наболничките прегледи,
и на смртноста и на дневните амбулантски прегледи, изјави за Фактор д-р Гзим
Нуредини, шеф на Ковид-центарот во Тетово,
Нагласува дека до утринава повторно има многу приеми, а информира и за пет починати пациенти, меѓу кои и млада жена.
-Во последното деноноќие имаме 16 нови пациенти поради компликации на корона вирусот. Сега во тетовскиот ковид-центар се лекуваат вкупно 124 пациенти. За жал, од вчера наутро до денеска утринава имаме пет починати пациенти, меѓу кои млада 39-годишна жена. Кај нема има историја на ендокринолошка состојба, станува збор за тироидната жлезда, но мора да потенцирам дека нејзината претходна здравствена состојба е целосно контролирана и без никакви проблеми. Донесена е со сатурација 45, во исклучително тешка состојба и за жал по неколку дневно лекување во болницата, почина. И последните петмина починати се невакцинирани пациенти, вели д-р Ниредини.
Истовремено нагласува дека не стивнуваат ниту амбулантските прегледи. За еден ден се прегледани дури 175 луѓе, додека има многу малку исписи од болницата. Во последните 24 часа, оздравеле само 13 пациенти кои се пуштени дома.
-Сигурен сум дека никој ништо не слуша, не чита, не гледа телевизија, јасно ми е тоа, бидејќи да беше поинаку, можеби ќе имавме подобра ситуација. Но, она што го констатираме секој ден, ние лекарите од Тетово, нам секој ден ни „умира по едно комбе“, кое има капацитет од 5 до 10 луѓе. Тоа е премногу. Сите починати се невакцинирани против болеста. Паролата што во моментов ја смислив, еве додека разговарам со вас е: „Невакцинирањето е злобно, тој што не се вакцинира, освен себе, убива и други луѓе“. Навистина не знам веќе дали воопшто има начин луѓето да разберат колку е сериозна и алармантна состојбата ако некој невакциниран се зарази со корона вирусот и настанат компликации, посочува д-р Нуредини.
Тој уште еднаш потенцираше, дека од сите хоспитализирани во Ковид-центарот во Тетово, повеќе од 90 проценти се невакцинирани луѓе, останатите се со само една примена доза, додека, како што вели, најмал е бројот на хоспитализирани пациенти кои ги примиле двете дози од вакцината против Ковид-19.
Анита Буховски