Нов кружен тек меѓу улиците „Втора македонска бригада“ и „Лазо Трповски“

Добивај вести на Viber

Градоначалниците на Град Скопје, на Бутел и на Чаир, Коце Трајановски, Петре Латиновски и Изет Меџити, денеска го пуштија во употреба новоизградениот кружен тек меѓу улиците „Втора македонска бригада“ и „Лазо Трповски“, на границата меѓу општините Бутел и Чаир. Во овој проект Град Скопје вложи 22 милиона денари.

- Овој кружен тек е формиран на нивото на постојниот коловоз и има една сообраќајна лента со ширина од 5,5 метри, која ги опслужува сите четири краци. Новоформираниот коловоз е покриен со асфалт со полимер на површина од околу 4.700 метри квадратни, изјави Трајановски.

На краците од улиците „Втора македонска бригада“ и „Лазо Трповски“ што водат кон кружниот тек се оформени тротоари покриени со бекатон плочки на површина од 900 метри квадратни, а во средината на кружниот тек е засадено зеленило на површина од 1.400 метри квадрати.

На кружниот тек е поставено ново улично осветлување, девет столба и 13 светилки, за кои Град Скопје потроши околу 1,5 милиони денари. Исто толку средства ќе се потрошат и за хортикултурно уредување на околниот простор. На изградба на овој кружен тек работеа екипите на градежната компанија „Бауер БГ“.