Обама признава – заканата од ирачките милитанти расте!

Добивај вести на Viber

Американскиот претседател Барак Обама признава дека радикалните сунитски екстремисти од организацијата „Исламска држава на Ирак и Левант“ (ИСИЛ) кои отворија фронт против ирачката Влада, од ден во ден добиваат поголема моќ и можат да придонесат за дестабилизација и на други земји во регионот. „Мора да бидеме претпазиливи. Во моментов проблемот е во тоа што ИСИЛ ја дестабилизира земјата. Но ова може да се прелее и кај некои други наши сојузници, како што е Јордан, на пример“, рече Обама. Тој забележа дека во моментот постојат повеќе закани кои треба да се држат „под будно око“ од страна на САД - Боко Харам во Африка и ќелиите на Ал Каеда во Јемен се само некои од нив. „Она што не можеме да направиме е да си мислиме дека можеме да си играме „убиј го молецот“ и да испраќаме американски трупи да окупираат различни земји секогаш кога овие организации ќе се појават некаде. Мора да имаме пофокусирана, повеќе насочена стратегија, да ги обучуваме локалните милиции и безбедносни сили за подобро да си ја извршуваат работата“, вели Обама.