Од ВМРО-ДПМНЕ бараат лидерска средба за името
Објавено во: Македонија 15 Мај, 2018
ВМРО-ДПМНЕ денеска повторно го повика премиерот, Зоран Заев да соопшти на јавноста што се разговара за името и повторно побара лидерска средба.
„Трет ден имаме молк од Владата и премиерот Заев на повикот за итна лидерска средба на која ќе се разговара за деталите и тековите на најважното прашање на граѓаните на Република Македонија, прашањето за името. Единствените информации со кои располага македонската јавност се оние кои се од грчките медиуми. Дополнително на ова претходеше еден процес на ретерирање во изјавите на премиерот и владините претставници околу прашањето за организирање на референдум и непромена на Уставот, што само ги зголемува дилемите дека работите се движат во непосакуван правец за Република Македонија“ – порача генералниот секретар на партијата, Игор Јанушев.
Тој побара премиерот Заев јавно да излезе и да каже што се преговара за името.
„Дали решението кое го договарате или веќе сте го договориле значи капитулација на Република Македонија? Нема ниту една причина да нема итна лидерска средба. Власта се плетка во сопствените лаги и лажни надежи искреирани за народот. Кажаа дека претседателот Иванов не е тука, а претседателот на државата е тука. Кажаа дека проблем бил терминот на одржување на средбата, а досега лидерите не се воопшто исконтактирани за можен термин“ - вели Јанушев.
Додава дека обврска на Владата е да бара консензус за вакви историски прашања. Итната лидерска средба ќе помогне, никако не може да одмогне, рече Јанушев.