Одобрени парите за 35 еко-автобуси за „еден од најзагадените градови во Европа“

Добивај вести на Viber

Европската банка за обнова и развој синоќа го одобри заемот од 10 милиони евра за да се купат 35 еко-автобуси. Во соопштението од банката стои дека со заемот ќе се подобри јавниот превоз и околината на еден од најзагадените градови во Европа. Проектот вреди 11,8 милиони евра.

Иако се лицитираше со бројки од 40, па и 50 автобуси кои се движат на природен гас, дефинираната бројка е 35 возила кои ќе имаат најмодерни мотори со Евро 5 стандарди, и треба да ги заменат старите дизели со Евро 2 стандард.

„Проектот има за цел да ги подобри и модернизира автобуските линии во Скопје преку купување на 35 автобуси на природен гас ("CNG") со мотори Евро 6, со цел да се обезбедат подобри еколошки и оперативни перформанси. За таа цел ЕБРД предвидува обезбедување на обезбедување на заем од 10 милиони евра за Јавното сообраќајно претпријатија, додека Град Скопје кој е основач на истото треба да обезбеди банкарска гаранција“, се вели во соопштението.

Во пакетот е предвидена и техничка поддршка за подготовка и имплементација на проекти, како и подобрување на ефикасноста и одржливост на работењето на компанијата (ЈСП) и реструктуирање на автобускиот сектор во Скопје.

„Главната цел на Проектот е да го зголеми и подобри нивото на јавниот транспорт и да го подобри квалитетот на воздухот во Скопје, кој во моментов е еден од најзагадените градови во Европа. Со оглед на тоа што новите автобуси ќе ги заменат старите дизел-автобуси Еуро II, предвидената инвестиција има значителни еколошки и здравствени придобивки и значително ќе го зголеми квалитетот и ефикасноста на услугите што ги нуди компанијата“, додава ЕБОР во образложението.

Очекувањата на банката се дека преку овој проект ќе се подобри животната средина, јавниот градски превоз и менаџирањето на ЈСП.

Одржувањето и управувањето на овие автобуси е лесно. Се очекува да ја подобрат сигурноста, безбедноста и ефикасноста на јавниот транспорт, додека технологијата на CNG ќе ги намали емисиите на загадување на воздухот: јаглерод диоксид за 19 проценти, PM честички за 98 отсто и NOx за 81 процент. 

Како дел од овој услов е Град Скопје долгорочно да го реконструира возниот парк и организацијата на ЈСП.

„ЕБРД евидентираше неколку недостатоци во претпријатието: недостаток на системи за управување со животната средина и социјалните прашања, недостаток на формален механизам за поплаки, нема поттик за зголемување на бројот на вработени жени, неодржување на депоата, несоодветно управување со безбедноста и здравјето при работа“, се вели во соопштението и се додава дека тоа треба да се надмине со обврските што треба да се превземат со овој договор за заем.