„ОИЛКО“ стартува на берза, ќе се раздвижи ли пазарот на хартии од вредност?

Добивај вести на Viber

Од утре на Берзата ќе се тргува и со акциите на „Оилко“ фирма за дистрибуција на нафтени деривати, основана од Макпетрол, дознава ФАКТОР од брокерски извори. Во „Оилко“над 5% од акциите поседуваат Андреја Јосифовски, првиот човек на Макпетрол(14,94%) и Макпетрол (35,61%), а уште 57 домашни физички лица имаат акции од фирмата. На сајтот на „Оилко“ пишува дека е командитно друштво со акции за транспорт, основано на 18.01.2007 год. Основач и најголем акционер во Друштвото е *Макпетрол* А.Д. Основна дејност на „Оилко“ е транспорт и дистрибуција на нафтени деривати. “Фирмата поседува сопствена автобаза лоцирана во село Миладиновци во близината на Скопје. Истата е изградена според сите безбедносни и еколошки прописи што се однесуваат на стационирање на возила што транспортираат опасни материи. Бројот на возила во возниот парк, високото ниво на техничка опременост на возилата, исполнувањето на сите законски барања, како и добиените Лиценци за вршење на јавен превоз на опасни материи во внатрешниот и меѓународниот сообраќај, го поставуваат ОИЛКО на лидерската позиција во Република Македонија и во поширокиот регион“ пишува во личната карта на компанијата. Во својот возен парк „Оилко“ како што објаснуваат од компанијата на нивната веб страна има 89 возила со кои се врши транспорт на светли деривати (бензински и дизел горива), транспорт на темни деривати (мазут и битумен), транспорт на компримиран природен гас (метан), транспорт на ТНГ или течен нафтен гас и 36 вагони за транспорт на светли деривати.