„Осигурување Македонија“ стана дел од „Виена Иншуренс Груп – ВИГ“

Добивај вести на Viber

Откако стана дел од австриската групација „Виена Иншуренс Груп – ВИГ“, осигурителната компанија „Кјуби“ се ребрендира во „Осигурување Македонија“. Групацијата од април годинава поседува 94 проценти од сопственоста на македонската компанија. - Стратегијата за раст и за напредување на ВИГ се темели на долгорочни инвестиции. Притоа се фокусираме на одржлив развој на премиите и профитот. Нашата цел е да бидеме една од најдобрите осигурителни компании на секој пазар, а неодамнешното проширување на нашите активности во Македонија го покажува токму тоа - истакна на денешната прес-конференција заменик-генералниот директор на ВИГ, Франц Козина. ВИГ, рече Козина, сега има пазарен удел во Македонија од 24,6 проценти и оцени дека македонскиот пазар има потенцијал за развој, презентирајќи ги податоците дека во Македонија по жител осигурувањето изнесува 55 евра, во Србија таа сума изнесува 72 евра, додека во земјите од Југоисточна Европа просекот е меѓу 200 и 500 евра. Австриската групација во Македонија беше присутна од 2007 година преку осигурителната компанија „Винер“. Групацијата работи во 24 земји, со 190 години искуство во осигурителниот бизнис. Има 24.000 вработени, и полисирана премија во 2012 година од 587 милиони евра.