Османи кажа која е најдобрата опција за земјава по ветото
Објавено во: Македонија 24 Декември, 2020
ЕУ згреши што го одложи почетокот на преговорите, вели министерот за надворешни работи, Бујар Османи.
Тој рече дека сториле што можеле, и дека граѓаните не треба да ги зафати апатија. Порача дека во унијата имаме пријатели и дека не треба да се откажеме од ЕУ.
„Процесот на одлучување во Унијата е сложен, со консензус, и ние на тоа мора да се навикнеме“, рече Османи пред пратениците во собраниската Комисија за надворешна политика.
Вели дека најдобрата опција останува со добра волја да се интензивира реализирањето на Договорот за пријателство, добрососедство и соработка и враќање на довербата од страна на Бугарија во неговата ефикасност и имплементација.
Бугарскиот вицепремиер Красимир Каракачанов во своето последно телевизиско гостување излезе со нова провокативна изјава, алудирајќи на тоа дека Македонија е таа која ги присвојува историските личности за севе.
„Потпишавме договор пред 3 години, тој не се запазува. Не знам дали знаете дека дури и Исус Христос е Македонец. Скопските политичари мораат да ја градат својата историја врз основа на автентични факти од нивната историја“, рече министерот за одбрана во интервјуто за бугарската национална телевизија.