Откриена проруска мрежа: Еве какво поткопување на безбедноста во Европа подготвувале
Објавено во: Свет 30 Март, 2024
Чешките разузнавачи открија мрежа финансирана од Русија која се користела за влијание врз членовите на ЕУ и Европскиот парламент.
„Откривме проруска мрежа која подготвуваше операција за проширување на руското влијание и поткопување на безбедноста во Европа“, изјави чешкиот премиер Петр Фиала.
Тој нагласи дека затоа на списокот со санкции додале две физички и едно правно лице.
„Локалните власти им го запленија имотот“, рече Фиала.
Чешките медиуми, повикувајќи се на разузнавачки извори, објавија дека порталот „Гласот на Европа“ им плаќал на политичари од Германија, Франција, Полска, Белгија, Холандија и Унгарија да влијаат на претстојните избори за Европскиот парламент.
Според чешките медиуми, контроверзниот портал ги објавил мислењата на политичарите кои барале ЕУ да ја прекине помошта за Украина.
Некои европски политичари кои соработуваа со Гласот на Европа за ова добија пари од Русија, а дел од нив ги искористија и средствата за предизборната кампања за јунските европски избори.
Меѓу партиите кои ги добија парите е и германската крајнодесничарска партија Алтернатива за Германија. Германскиот весник Шпигел објави дека парите биле предадени во готово на тајни состаноци и преку пазарот на криптовалути.
Зад пропагандната мрежа наводно стојат прорускиот украински политичар Виктор Медведчук и неговиот близок соработник Артјом Марчевски, кој наводно раководи со порталот „Гласот на Европа“.
Чешка ги стави и споменатите мажи и порталот на листата на санкции.
Холандскиот премиер Марк Руте го опиша извештајот за проруското влијание врз политиката на ЕУ како загрижувачки и рече дека Холандија „ќе го направи она што е потребно“.
„Ова е закана за нашата демократија, нашите слободни избори и слободата на говорот“, рече Руте во Хаг.