ОТВОРЕН ПАТОТ НА ТРАМП, ХЕЈЛИ СЕ ПОВЛЕЧЕ ОД ТРКА: Сега тој е единствениот кандидат за претседател на републиканците

Добивај вести на Viber

Поранешната гувернерка на Јужна Каролина Ники Хејли објави дека ја прекинува кампањата за претседателска номинација на Републиканската партија.

„Дојде време да го прекинам моето кандидирање. Реков дека сакам гласот на американскиот народ да се слушне. Тоа е она што го направив. Не се каам“, рече Хејли на прес-конференција во Чарлстон, Јужна Каролина.

„Со голема веројатност, Доналд Трамп ќе биде републиканскиот кандидат. Му честитам и му посакувам се најдобро. Му посакувам добро на секој што би бил претседател на Америка“, додаде Хејли.

Таа им порача на своите поддржувачи да бидат силни и храбри и да не се плашат. „Не се обесхрабрувајте бидејќи Бог ќе биде со вас каде и да одите“, изјави Хејли.

Одлуката за прекин на кампањата значи дека единствениот преостанат кандидат за републиканската претседателска номинација е Доналд Трамп.

Уште пред Ники Хејли официјално да се откаже од изборната трка, по „супер вторник“ беше сосема извесен нов „судир“ меѓу актуелниот американски претседател Џозеф Бајден и поранешниот претседател Доналд Трамп на општите избори во САД. И двајцата остварија големи победи на внатрепартиските избори на демократите и републиканците.

Убедливи резултати

Резултатите го велат следново: Бајден постигна убедливи победи на внатрепартиските избори во Вермонт, Ајова, Вирџинија, Северна Каролина, Тенеси, Оклахома, Масачусетс, Мејн, Арканзас, Алабама, Тексас, Колорадо, Јута, Минесота и Калифорнија. Неговиот единствен пораз беше во Американска Самоа, во Јужниот Пацифик, каде победи Џејсон Палмер.

На републиканските избори Трамп триумфираше во Вирџинија, Северна Каролина, Тенеси, Оклахома, Мејн, Алабама, Масачусетс, Арканзас, Тексас, Колорадо, Минесота и Калифорнија. Единствената преостаната ривалка на Трамп за републиканската номинација, Ники Хејли, освои најмногу гласови во Вермонт, откако претходно победи во Вашингтон.