Пад на странските инвестиции во регионот

Добивај вести на Viber

Економската криза и континуираната политичка нестабилност се причини што странските директни инвеститори буквално бегаат од Западен Балкан, на што укажуваат овогодинешниот извештај за странски директни инвестиции во земјите од регионот, пренесе турската агенција Анадолија.

Во истражувањето кое го спроведе оваа агенција, најлоша е ситуацијата во Босна и Херцеговина, каде, според податоците на Централна банка, во првите девет месеци од годинава се остварени 56,7 милиони конвертибилни марки странски инвестиции, што е околу 29 милиони евра.

Станува збор, за како што се наведува, драматичен пад на странските инвестиции во земјата.

Приливот на странски инвестиции во 2011 изнесувал околу 289 милиони евра, односно 2,2 отсто од БДП, што е повеќе отколку во 2010 година, кога е регистриран прилив од 220 милиони конвертибилни марки. Најмногу пари тогаш пристигнале од Русија, околу 64 милиони евра, Австрија со 54 милиони евра и Србија околу 48 милиони евра.

Професорот од Економскиот факултет во Сараево, Вјекослав Домљан укажува дека СВОТ анализата на економските земји од регионот, а посебно во БиХ, покажува дека економски гледано, постои поголема слабост отколку предност и повеќе закани, отколку прилики.

Според него, шансите за регионот исто така се лоши и дека има малку изгледи дека на овие простори ќе дојдат моќни светски компании.

Во Словенија во првите осум месеци од годинава вложени се 180 милиони евра, што е двојно помалку од минатогодишните 350 милиони евра за истиот период..

Релативни стабилна е Црна Гора, чии странски директни инвестиции ги надминале оние во Хрватска, при што за првите половина година во Црна Гора се вложени 176 милиони евра.

Од друга страна, во првото полугодие на 2012 година, Хрватска имала 154,4 милиони евра странски директни инвестиции во првата половина од годината.

Во првите седум месеци од 2012 година нето вложувањата во Србија изнесувале 105 милиони евра.

Во однос на Косово, Анадолија наведува дека според податоците на Централната банка на Косово, од 2000 година па се до првото тримесчје на 2012 година, странските вложувања на Косово достигнуваат износ од околу 2,4 милијарди евра.

Анадолија ја пренесува изјавата на македонскиот министер за финансии Зоран Ставрески, според кого, странските директни инвестиции во Македонија од 2007 до 2015 година достигнале 1,55 милијарди евра.

Според последниот извештај на Светската банка за регионот на Југоисточна Европа, просекот на странски директни инвестиции по глава на жител е 285 долари.

Според тој показател, странските директни инвестиции по жител во Србија изнесуваат 341, во Косово 284, во Албанија 232, во Македонија 199 и БиХ 77 долари по глава на жител.

Странските директни инвестиции во ЕУ се удвоиле во однос на 2010 година, кога е забележан драстичен пад.