ПАДОБРАНЦИТЕ НЕ СЕ ОТВОРИЈА: Пакети со помош од САД усмртија пет Палестинци
Објавено во: Свет 09 Март, 2024
Пакети со помош од САД усмртија пет Палестинци откако не се отвориле падобранците.
Пет Палестинци загинаа денеска во Појасот Газа кога врз нив паднаа пакети со помош од САД, откако падобраните на кои биле поставени не се отвориле, објави британскиот весник „Телеграф“. Светските агенции јавија дека се повредени 10 луѓе.
На снимката објавена на социјалните мрежи се гледа дека неколку пакети паѓаат со екстремно голема брзина на земја. Транспортен авион ги фрли над Газа.
Во текот на изминатата недела, американската војска, во координација со Јордан, Египет и Франција, испорача над 70.000 оброци со храна во Појасот Газа.
Претходно британскиот министер за надворешни работи Дејвид Камерон изјави дека Обединетото Кралство ќе работи заедно со САД за отворање на поморски коридор преку кој помошта за енклавата би можела да се доставува директно по море. Претставниците на хуманитарните организации со месеци предупредуваат дека ќе има глад во Газа поради недостигот на храна. Имаше случаи на деца кои починаа од неухранетост. Палестинската терористичка група Хамас лани на 7 октомври го нападна Израел и оттогаш трае војната. Загинаа скоро 30.000 Палестинци во операцијата на Газа.