Панче Тошковски: Да не се дава етнички предзнак на последните акции, се апсат од разни етникуми
Објавено во: Македонија 17 Октомври, 2024
Министерот за внатрешни работи Панче Тошковски во вечерашното гостување на ТВ Алфа рече дека на последните две акции на полицијата не треба да им се дава етнички предзнак, бидејќи уапсените се од различен етнички состав.
За акцијата со уапсените цариници во Струмица и Гевгелија тој вели дека „Добар дел од нив биле Македонци“.
- Се апсеа царинарници и еден полициаец, бројка од 16, за кои што во рамки на една оперативна акција спроведена по Обвинителството за организиран криминал и корупција, се документирале докази повеќе од една година. Да речеме дека се докажува со цврсти докази поткуп и злоупотреба на службена положба, рече Тошковски.
За акцијата во Охрид, Струга и Тетово со уапсени 13-мина за тргување со оружје, луѓе и дрога тој рече дека „најголем дел од оние кои се приведени не се Македонци“.
- Многу години наназад го работеле она што го работеле со паралелни структури во рамки на државата кои им овозможувале да го прават тоа што го прават. Не можеме да расчистиме со криминалот, ако не расчистиме со криминалот во внатрешните редови на државата, наведе Тошковски.