Паника во училиштата, родители земаат деца, Филипче најавува нови мерки

Добивај вести на Viber

Паника почна да се шири меѓу родителите во училиштата. Дел од родителите по социјалните мрежи веќе бараат да прекине наставата во училиштата, и пишуваат пораки во стилот „ајде да си ги земеме децата од училиште“.

Некои родители утрово, откако ги однеле децата на училиште, наводно веќе тргнале да ги земат оттаму.

Тоа го мислат и некои од наставниците и професорите, кои упатуваат пораки до власта и до министерот за здравство Вeнко Филипче, дека можеби е време да се затворат училиштата.

Паниката од коронавирусот во земјава дополнително се загреа откако се дозна дека директорката на Кожна клиника која работела таму, е позитивна на овој вирус.

Три деца од едно основно училиште, „Владо Тасевски“ во скопската населба Тафталиџе, општина Карпош, веќе се во самоизолација.

Фактор побара став од директорката на ова основно училиште, но таа ни изјави дека во училиштето состојбата се држи под контрола, а дека сите информации во врска со ова прашање ќе се даваат преку Општина Карпош.

„Држиме се под контрола. Договорени сме дека сите информации ќе одат преку Општина Карпош, затоа ве молам, оттаму да ги обезбедувате сите нинформации“, вели директорката на ОУ „Владо Тасевски“.

Од Општина Карпош за Фактор велат дека во „Владо Тасевски“ станува збор за три деца, на родители кои биле на симпозиумот во Рагуза каде заразената директорка од Кожно држела предавање, по што децата веќе од вчера се повлечени од училиште и од денеска се во изолација.

Потврдуваат дека е точно оти има родители што ги зеле децата од училиште.

Има и едно дете од „Вера Циривири-Трена“, чиј родител работи на Клиниката за дерматологија и исто е во самоизолација. Поголем дел од родителите на учениците од таа паралелка денеска не ги однеле децата на училиште.  

А на офиоцијалната веб страница на Општина Карпош на фејсбук како последна засега е објавена информацијата од докторката Кујтиме Мехмети, вработена на Клиниката за дерматологија, која минатата недела одржала предавања во ООУ „Братство”.  

Оттаму велат дека се постапува согласно сите здравствени протоколи, во координација со Министерството за здравство. За жал, ова се е резултат на неодговорниот пристап на еден човек - доктор.

„Јас др.Кујтиме Мехмети вработена во Клиниката за Дерматологија во моментот сум во добра општа здравствена состојба, без никакви симптоми и сум во домашна изолација 14 дена, како и сите останати вработени во Клиника за дерматологија. Предавањето во ООУ „Братство” го одржав на ден 03.03.2020 (вторник).

Во понеделник, 02.03.2020 со директорката на Клиниката за Дерматологија не сум била во близок контакт. Во вторник директно отидов во ООУ „Братство”, каде и предавав за договореното предавање, па потоа отидов на работа.

Имајќи предвид дека во понеделник не сум била во близок контакт со диркторката на Клиника за дерматологија, според протоколот: Категории на ризик според експозиција поврзана со меѓународни патувања, или контакт со потврден случај, спаѓам во група на низок ризик!“, пишува докторката Мехмети.

Еден вработен од средното училиште „Никола Карев“ самоиницијативно не доаѓал на работа, бидејќи минатата недела бил да се прегледа на Скопските клиники. 

На фејсбук се огласи и министерот за здравство Венко Филипче. Тој вели дека се можни и нови мерки.

„Претпладнево ќе одржиме состанок со Комисијата за заразни болести и комисијата за следење и информирање за состојбите со корона вирусот. На средбата ќе се дискутираат и евентуални нови засилени мерки за заштита на населениото и превенција од понатамошно ширење на вирусот кои Комисијата ќе ги достави како предлог до Владата. Препораките ќе бидат на дневен ред на денешната седница на Владата, а одлуката на Владата ќе биде соопштена на прес-конференција веднаш по завршувањето на седницата“, вели министерот.

Тој напиша дека здравствената состојба на сите 7 пациенти кои се позитивни на корона вирусот и се хоспитализирани на Клиниката за инфективни болести и фебрилни состојби е стабилна.

„Имено, покрај организирањето на едукативни предавања поврзани со начините за превенција од корона вирусот, насоките за постапување наложуваат образовните установи да ги одложат планираните патувања и екскурзии на ученици, студенти и вработени во Република Италија. Исто така, во најкус можен рок по телефонски/електронски пат потребно е образовните установи да обезбедат информации од сите свои вработени, ученици и студенти - дали во последните 2 недели патувале или живеат со некој кој патувал во следниве земји/региони: Ломбардија, Венето, Емилија Ромања и Пиемонт во Италија, како и во Кина, Хонг Конг, Иран, Јапонија, Маку, Филипини, Република Кореа, Сингапур и Тајван. Лицата кои ќе дадат потврдна информација потребно е да не доаѓаат на работа, односно да не посетуваат настава, додека не добијат соодветни инструкции, односно совети за следни чекори што ќе треба да ги направат зависно од ситуацијата и од планот на надлежните здравствени институции и Владата“, пишуваше во препораките.

Од Министерството велат дека ќе се разговара за нови препораки и штом се усвојат, јавнјоста веднаш ќе биде информирана.

(Н.Н.Ф. - А.Т.)