Песков: Путин не се закануваше со нуклеарно оружје, медиумите ги извадија зборовите од контекст
Објавено во: Свет 14 Март, 2024
Кремљ појаснува, според нив коментарите за нуклеарното оружје дадени од рускиот претседател Владимир Путин во интервју за државните медиуми не претставуваат закана за негово користење и ги обвини САД дека намерно ги извадиле забелешките од контекст.
Путин во интервју објавено во средата рече дека Русија е технички подготвена за нуклеарна војна и дека ако САД испратат војници во Украина, тоа ќе се смета за значителна ескалација на конфликтот.
Коментирајќи ги зборовите на Путин, портпаролката на Белата куќа, Карин Жан-Пјер, им изјави на новинарите дека Вашингтон разбира оти рускиот лидер ја повторува нуклеарната доктрина на Москва, но ја обвини Русија дека користи „непромислена и неодговорна“ нуклеарна реторика за време на конфликтот со Украина.
Портпаролот на Кремљ, Дмитриј Песков, во четвртокот изјави дека Путин само одговара на новинарски прашања на оваа тема и ги повторил веќе добро познатите околности во кои Русија теоретски ќе биде принудена да користи нуклеарно оружје, пренесува Ројтерс.
Песков, исто така, потенцираше дека треба да се обрне внимание и на фактот дека Путин во истото интервју посочил дека идејата за употреба на тактичко нуклеарно оружје во Украина никогаш не му поминала на ум.
Запрашан за коментарите на Белата куќа, Песков рече: „Ова беше намерно вадење на нешто надвор од контекст. Путин во ова интервју не се закани дека ќе употреби нуклеарно оружје. Претседателот само зборуваше за причините зошто употребата на нуклеарно оружје може да биде неизбежна“.
„Тоа се причините наведени во нашите релевантни документи, кои се познати во целиот свет. Згора на тоа, сите на Запад намерно ги игнорираа неговите зборови кога рече дека не му паѓа на памет да користи тактичко нуклеарно оружје (во Украина), и покрај различните ситуации што се создадоа за време на борбите.
„Ова е намерно искривување на контекстот и неподготвеност да се слуша претседателот Путин.