ПОГОЛЕМА СВЕСТ: Амбасадори решија да го зачистат кејот на Вардар
Објавено во: Македонија 26 Април, 2018
„Зачисти, па твитни“. Вака гласеше акцијата која денеска беше спроведена на кејот на реката Вардар во Скопје.
Во акцијата учествуваа странски амбасадори во земјава, како и тимови од Пакомак и Пивара Скопје, компании кои го поддржале настанот.
Меѓу оние кои чистеа беше и вицепремиерот Бујар Османи кој на Фејсбук напиша дека станува збор за успешна иницијатива на Холандската амбасада.
Покрај холандскиот амбасадор, Ваутер Плом, во акцијата за зачистување учествуваа и британскиот и американскиот амбасадор, Чарлс Герет и Џес Бејли.
„Иницијатива која ја гледам повеќе како поттик за повеќе вакви акции, како и други активности, со кои ќе влијаеме на нашата свест дека нашата средина, нашата околина е наша обврска. Човек ќе се подготвува за матура, за роденден, свадба, па ќе се потшиша, ќе се дотера, ќе подзачисти, за тоа како да имаме вградено личен срам, ама како да ни недостасува малку одговорност и срам кога се движиме во валкана средина, како таа да не е наша обврска, како да не е наша одговорност. Ние сме на добар пат да влеземе во ЕУ, и крајно време е да почнеме малку повеќе да се грижиме за чистотата на нашата средина“, напиша Османи на Фејсбук.
фото: Плусинфо