ПОЛИЦАЕЦОТ Е НА КАРИЛ, НО НЕ КАЖУВААТ ЗА НЕГОВАТА СОСТОЈБА: Има прострелни рани

Добивај вести на Viber

Повредениот затворски полицаец, кој настрада синоќа при грабнувањето на затвореникот од „Идризово“ има прострелни рани и итно е пренесен на Клиниката за анестезија реанимација и интензивно лекување-КАРИЛ, каде што се сместуваат пациенти во најтешка здравствена состојба.

По неколкучасовни обиди на Фактор да се добие информација од КАРИЛ за здравствената состојба на полицаецот И. Х., особено поради наводите на некои медиуми дека има прострелни рани во ногата, но дека му било пукано и во бешиката, директорката Маја Мојсова Мијовска, кусо одговори „нема изјава“.

Инаку, при синоќешното грабнување на затвореникот кој требало да служи затворска казна од 20 години заради убиство, во комбето со кое е превезуван кон болница, најверојатно настанала вистинска борба, при што насилно му бил одземен пиштолот на И. Х. додека возел.  

Единствено МВР излезе со официјално соопштение за крвавиот инцидент.

-Синоќа во 23:20 часот четворица вработени во Затворската полиција кои биле со комбе „Форд транзит“ побарале помош од полициски службеници од СВР Скопје. Според нивната пријава, додека вршеле спровод  на осуденик Б.М од КПУ „Идризово“ кон Ургентниот центар „Мајка Тереза“, на автопатот осуденикот му го одзел пиштолот на возачот И.Х од затворската полиција, пукал и го ранил. Потоа осуденикот побегнал со патничко возило „ауди“. Повредениот затворски полицаец е пренесен во Ургентен центар за укажување лекарска помош, објави МВР.

Други детали засега нема.

А. Б.