Добивај вести на Viber
Министерството за внатрешни работи најостро ги демантира како што рече лагите кои денеска на прес - конференција ги изнесе Игор Јанушев од партијата ВМРО-ДПМНЕ, каде меѓу другите невистини, беше изнесена лага дека во СВР Скопје пред пет дена наводно било заведено дека убиството врз малолетната В.Ѓ. го извршил Љ.П., а, наводно, не било ништо преземено.
„Тоа е апсолутна невистина. Таква работа не постои. Згрозени сме од самиот факт што оваа партија дури и за ваква трагедија шири дезинформации. Министерството за внатрешни работи и ОЈО Скопје денеска на прес конференција детално презентираа сè што е преземено во врска со овој случај. Апелираме да престане ширењето на лаги и дезинформации, кои само нанесуваат штета на истрагата“, велат од полицијата.
Јанушев праша за неодговорените прашања.
„Додека Оливер Спасовски организираше самит во Скопје и се фалеше дека ја гарантира безбедноста на учесниците, рекетарско - криминална група од неколку членови харала низ Скопје и убивала невини луѓе, убија дете! Главните и суштински прашања за Спасовски се – кога истрагата дознала за извршителите на грозоморните убиства и дали криеле и не преземале ништо заради самитот на ОБСЕ? Зошто полицијата на Спасовски реагирала предоцна? Дали е нормално за ваков траорен настан да ја информираат јавноста за трагичните настани преку бледо соопштение во 21 часот во недела – што кријат и за што им требаше време од објавување на веста до одржување на прес конференција? Во СВР Скопје официјално е заведено дека станува збор за Палчо уште пред 5 дена! Зошто 5 дена не биле преземени никакви дејствија во однос на таа информација?“, кажа Јанушев.
Праша како може неколку дена да има исчезнато лице со неговото сопствено возило, кое потоа убијците го користат за киднапирање на друго лице и со него вршат ново кривично дело – киднапирање и убиство.