Политичка иницијатива за укинување на Тик-Ток во Македонија

Добивај вести на Viber

Либерално-демократската партија најостро го осудува неодговорното и неконтролирано ширење на содржини на социјалните мрежи и покрена иницијатива за укинување на Тик-Ток во Македонија.

Единаесет деца се повредени во Скопје поради „Тик-Ток“ предизвикот ,,Супермен’’.  Најмладиот има само 10 години. Билансот е во последните 6 дена. Од ЛДП велат дека поради овој предизвик само во последните 24 часа резултатот е повреди кај уште шест деца во Скопје и други градови низ Македонија.

Потсетуваат на предлогот кој минатата година го доставија до Министерството за образование и наука непосредно по немилите настани во соседна Србија, а со кој се бара контрола на содржината која се емитува на социјалните мрежи, како и забрана на содржините кои поттикнуваат насилство.

„Најмладиот од повредените има само 10 години, а најстариот 17 години. Овие податоци не се само загрижувачки, туку алармантни. Децата, нашата најранлива категорија, стануваат жртви на опасни игри кои се пласираат преку социјалните мрежи. Тие содржини, под маската на „забава”, претставуваат сериозна закана за нивното физичко и ментално здравје, а ние како општество мора да преземеме одговорност и да ги спречиме ваквите несреќи.

Немањето соодветна контрола врз содржините кои се достапни на социјалните мрежи овозможува ваквите „игри” да стигнат до најранливите корисници. Ова е директен удар врз нашата колективна одговорност како политички партии, како родители, како институции, но и генерално, како општество“, велат од ЛДП..

Од таму бараат итно регулирање на содржините на социјалните мрежи со воведување на мерки за забрана на оние кои поттикнуваат насилство и саморазорувачко однесување, зголемување на надзорот и воведување санкции за платформи кои овозможуваат опасни содржини достапни за малолетници.