Половина милион евра ќар за Топлификација

Добивај вести на Viber

Топлификација го објави консолидираниот биланс на успех за првите девет месеци од годинава, во кои се остварени за 30% поголеми приходи од продажба од истиот период лани и зголемена добивка за 6,7%. Според извештајот,  Топлификација остварила вкупни приходи од 1,8 милијарди денари. Тие се целосно од домашниот пазар. Иако бруто добивката на Топлификација е зголемена за 21%, а оперативната за 15%, сепак на крај има помала нето добивка, која изнесува 34,8 милиони денари(565 илјади евра). Ова се должи на тоа што трошоците на компанијата за продажба се зголемени за 32%, најмногу за набавка на суровини. Зголемени се и финансиските расходи, како и оперативните за 19%. Овие резултати на Скопска топлификација се остварени во услови на зголемени цени на парното греење за 10,73% од 1 јануари годинава. Од 1 август Топлификација почна да наплаќа за уште 3,15% повисоки цени за топлинска енергија. Резултатите пак во неконсолидираниот биланс на успех на Топлификација за првите девет месеци покажуваат загуба од 69, 4 милиони денари, но објаснувањето од Топлификација е дека компанијата врши дејност само во зимскиот период кога и се фактурира услугата. “Фиксните трошоци за дејноста производство, дел се фактурираат со фактурите од јануари до април, а дел со фактурите од октомври до декември.При таквиот распоред на фактурирање на фиксните трошоци нормално е во периодот од јули до септември да се појават негативни финансиски резултати кои ќе се покријат со фактурите за периодот октомври-декември“, се вели во соопштението од Топлификација.