Помина и нацрт амандманот за измена на Уставот во Преамбулата
Објавено во: Македонија 09 Ноември, 2018
Помина попладнево и вториот нацрт амандман за уставни измени во собраниската Комисија за уставни прашања.
Имаше девет гласа „за“ и седум „против“. Со вториот нацрт амандман за измена на Уставот во Преамбулата на највисокиот правен акт одлуките на АСНОМ се заменуваат со Прогласот од АСНОМ и се додава Охридскиот рамковен договор.
За опозицијата со вториот нацрт амандман се бришат најважните државотворни документи за македонскиот народ.
Власта тврди дека предлогот е добар и прифатлив.
Македонскиот министер за надворешни работи, Никола Димитров во обраќањето пред членовите на собраниската комисија изјави дека е мошне важно за вакви прашања да постои отвореност и подготвеност за дијалог.
„Врз основа на Договорот се утврдува меѓусебната постоечка граница меѓу Репбулика Македонија Република Грција како неповредлива меѓународна граница, при што се презема реципрочна обврска ниту една од двете држави да нема некакви претензии кон кој било дел од територијата на соседната држава, ниту пак претензии за промена на нивната меѓусебно постоечка граница. Двете држави исто така се обврзаа дека нема да поддржуваат претензии од трети страни во однос на неповредливоста на нивната заедничка граница", вели Димитров.
На денешната седница е отворена и расправата за третиот нацрт амандман. Меѓутоа расправата по него ќе продолжи утре во 11 часот.