Пониски цените на производителите на индустриски производи

Добивај вести на Viber

Продажните цени на производителите на индустриски производи и на домашниот и на странските пазари бележат намалување.

Според објавените податоци на Државниот завод за статистика,  продажните цени на производителите на индустриски производи на домашниот пазар се пониски за 0,8 отсто на месечно ниво, а за 1,4 отсто на годишно ниво. Пониски се во групата Капитални производи за 2,0 отсто, во групата Нетрајни производи за широка потрошувачка за 1,2 отсто, во групата Енергија за 0,8 отсто, во групата Трајни производи за широка потрошувачка за 0,3 отсто и во групата Интермедијарни производи, освен енергија за 0,1 отсто.

Во август 2013, во споредба со август 2012, продажните цени на производителите на индустриски производи на домашниот пазар се пониски во групата Капитални производи за 4,9 отсто, во групата Енергија за 3,0 отсто, во групата Трајни производи за широка потрошувачка за 2,2 отсто и во групата Интермедијарни производи, освен енергија за 2,1 отсто.

На странските пазари цените се пониски за 3,1 отсто на месечно ниво, а за 3,9 отсто на годишно ниво.

Во јули 2013, во споредба со јуни 2013, продажните цени на производителите на индустриски производи на странски пазари се повисоки во секторот Рударство и вадење камен за 2,4 отсто, а во секторот Преработувачка индустрија се пониски за 3,7 отсто.

Во јули 2013, во споредба со јули 2012, продажните цени на производителите на индустриски производи на странски пазари се повисоки во секторот Рударство и вадење на камен за 5,6 отсто, а во секторот Преработувачка индустрија се пониски за 4,9 отсто.