Поранешен пратеник на СДСМ со три компании за производство на електрична енергија за еден месец

Добивај вести на Viber

Поранешниот пратеник на СДСМ, Драган Ѓорѓиев од Ново Село, во екот на „зелената транзиција“ ја регистрираше и третата компанија за еден месец за производство на електрична енергија во кои тој е ко-сопственик.

„Грин Енерџи Груп“ со седиште во Битола е регистрирана заедно со Атанас Јанушев од Ново Село како и со уште двајца косопственици, а Ѓорѓиев е еден од двајцата управители.

Претходно Ѓорѓиев пред еден месец ја регистрираше „Пелагонија Солар“ со седиште во Карпош во кои тој е сопственик заедно со уште двајца партнери, од кои едниот е физичко лице од Аеродром а другиот првно лице од Карпош, додека именуван управител е трето лице.

Втората инвестиција во истиот период е „ДГД Електроволт“ регистрирана во Струмица. Ѓорѓиев е ко-сопственик заедно со сосема други две физички лица од Берово и Ново Село, додека еден од двата управители е трето лице од Василево.

Опозициската ВМРО-ДПМНЕ во 2020 го посочи Ѓорѓиев како еден од сопствениците на објект за марихуана во Босилово кој наводно бил изграден спротивно на закон, односно прво бил изграден па потоа легализиран со амин на поранешниот премиер Зоран Заев, како негов некогашен сопартиец од собранискиот состав, а ортак во овој случај му бил горенаведениот Атанас Јанушев.

Ѓорѓиев беше пратеник во македонскиот парламент во собранискиот состав 2002-2006, кога исто така и Заев беше своевремено народен претставник. Тој е дипломиран електро инженер. Пратеник стана како бизнисмен сопственик на приватна фирма Мастер - Дооел.

Засега нема податоци колкав е потенцијалот на овие инвестиции, ниту на кој начин ќе се произведува електричната енергија.