Потресно сведочење на девојката на Саздо, стравува за својот живот

Добивај вести на Viber

Девојката на навивачот кој бешпе претепан до смрт Никола Саздовски сведочепе денеска во Кривичниот суд, но поради видна вознемиреност кај малолетничката, беше решено да се исклучи јавноста, односно да дава исказ без присуство на медиуми.

Претходно таа рече дека и се јавувале на мобилен телефон и дека добивала закани.

„Ми се јавија на телефон во училиште, не знам кој ми се јави“, рече девојката.

В.Б. беше видно вознемирена. Таа стави капа на главата и кажа дека добивала закани преку телефон. Судијката ја натера да ја симне капата, по што нејзиното сведочење беше прекинато за да реши судечкиот совет дали таа ќе сведочи јавно. По кратката пауза судењето продолжи без присуство на јавноста.

Претходно таа запрашана од судијката Даниела Алексовска-Стефановски дали имала закани од некого во однос на сведочењето за настанот, одговори позитивно.

Девојката на Саздовски е прв сведок кој треба да даде исказ за убиството на Никола Саздовски, таа била присутна на лице место кога се случил нападот.

Малолетниот сведок, согласно со ЗКП, ќе даде исказ пред судот со присуство на родител.

Судот по барање на обвинителството и адвокатот на семејството на Саздовски, Ванчо Шехтански, одлучи да ја исклучи јавноста за време на сведочењето на девојката на Никола Саздовски за нападот врз 20-годишниот член на навивачката група „Комити“ кој поради тешките повреди почина на КАРИЛ 10 дена по немилиот настан.

Обвинетите Бесим Беља и Скендер Демири денеска во Кривичниот суд се изјаснија дека не се чувствуваа виновни за убиство на свиреп начин на Никола Саздовски.

Јавниот обвинител Ангел Фидовски рече дека ќе докаже дека двајцата обвинетите заедно со третообвинетиот, кој е во бегство, со умисла го лишиле од живот Никола Саздовски на начин што на 29.6.2018 на автобуската кај „Алкалоид“ го претепале нанесувајќи му смртни повреди. Тие му побарале лична карта и го прашале дали тој е Саздо. Тој потврдил и почнале да го тепаат по што Саздовски паднал на тротоарот, а обвинетите без милост со клоци продолжиле да го удираат по глава и градите. Саздовски бил префрлен на КАРИЛ, каде му била констатирана мозочна смрт, а на 9 јули починал.

Обвинителот рече дека ќе докажат дека обвинетите го сториле убиството за што имаат сведоци, но и вешти лица од судска медицина кои правеле обдукција на телото на Саздовски.

Во воведен говор адвокатот Насер Руфи рече дека обвинетиот Беља немал никаква намера, ниту умисла да го лиши од живот Саздовски и додаде дека ќе докажат дека единствена причина за смртта која настапила е поради металната кутија на ЕВН која се наоѓа на автобуската постојка.