Пристигнуваат новите автобуси на ЈСП
Објавено во: Македонија 21 Април, 2020
Петре Шилегов, градоначалникот на Скопје, со објавена фотографија најави дека пристигнуваат новите автобуси на Градскиот сообраќаен превоз, кои требаше да превезуваат патници на скопските улици и булевари уште во средината на март, но пратката до сега не се реализира поради околностите со затворањето на Европа.
„На пат кон Скопје“, напиша Шилегов за првите автобуси на гас за ЈСП „Скопје“ од германскиот производител „МАН“. Испораката на еколошките автобуси ќе оди фазно. Според договорот кој беше потпишан лани во септември, ќе бидат набавени вкупно 33 нископодни автобуси, 21 единечен со капацитет за 81 патник и 12 зглобни за 149 патници. Сепак, корона кризата ја промени планираната динамика на испорака.
Во сите автобуси ќе има дополнителна опрема, како вградени полначи за телефони. Со новите еколошки автобуси годишно ќе се заштедат 25.000 евра за гориво во споредба со другите и воопшто нема да загадуваат, бидејќи емитуваат незначителна концентрација на ПМ честички.