Проф.Поповски: Мораше да се направи попис пред Законот за јазици
Објавено во: Македонија 16 Март, 2018
Македонецот Петар Поповски кој како професор и научник работи во Данска се огласи за Законот за употреба на јазиците, сметајќи дека најпрво морало да се спроведе попис пред да се изгласи и дека на Македонија по речиси две децении итно и е потребно спроведување на оваа статистичка операција.
„Пред да се означи законот за јазици како регресивен или прогресивен, потребна е една досадна, но многу прогресивна операција што ќе ги стави фактите на место: попис. Тие што ја спречуваат се дефинитвно регресивни, џабе сите други приказни“, пишува професор Поповски.
„Сметам дека зборувањето на повеќе јазици од мали нозе е богатство, и дека комуникацијата на повеќе јазици во едно општество е богатство на тоа општество. Но, сметам и дека знаењето е богатство, а пописот е знаење. Ние може колку сакаме да коментираме дека јазикот и пописот немаат врска, но факт е дека постои статистичка бројка над која одредена групација поминува критична маса со која ваквите барања стигнуваат на агенда и, во најпозитивен случај, доведуваат до поотворено општество. Но, таа статистичка бројка е клучна и мора да биде над некој праг; во спротивно ќе треба ист закон да се донесе за секој можен јазик. Јас само викам дека таа статистичка бројка треба точно да се утврди“, напоменува Поповски на својот ФБ профил.
Поповски, пред две години, беше прогласен за еден од петте најуспешни истражувачи во Данска, при што наградата му беше врачена од страна на данската принцеза Мари. Важи за еден од најнадежните научници и работи на светски значајни проекти.