ПРОМЕТОТ ВО ИНДУСТРИЈАТА ПОВТОРНО БЕЛЕЖИ ПАД - еве кои сектори се со најголемо намалување
Објавено во: Економија 17 Октомври, 2024
Нов пад на прометот во индустријата регистрираше Државниот завод за статистика. Имено, во август годинава, во однос на истиот месец лани прометот е намален за 8,9 проценти.
Според главните индустриски групи, вкупниот промет во индустријата во август бележи опаѓање кај Интермедијарни производи, освен енергија за 5,6 проценти, Капитални производи за 18,3 отсто и Tрајни производи за широка потрошувачка за 5,6 проценти, додека пораст бележи кај Нетрајни производи за широка потрошувачка за 1,8 отсто.
- Прометот во индустријата, вкупно, во август во однос на јули 2024 година, е намален за 6,4 проценти. Во периодот јануари – август годинава, пак, во споредба со истиот период од 2023 се бележи пад од 12,8 отсто.
На домашниот пазар, прометот во индустријата во август 2024 година е помал за 9,6 проценти. Според главните индустриски групи, опаќање се бележи кај Интермедијарни производи, освен енергија за 23 отсто, Капитални производи за 27,3 проценти и Tрајни производи за широка потрошувачка за 14,3 отсто, додека пораст бележи кај Нетрајни производи за широка потрошувачка за 2,4 проценти - се наведува во соопштението на ДЗС.
Намалување од 10,5 проценти е евидентирано и во прометот во индустријата на странските пазари, во август годинава во оснос на август лани. Според главните индустриски групи, опаѓање има кај Интермедијарни производи, освен енергија за 1,6 проценти, Капитални производи за 18,4 отсто и Tрајни производи за широка потрошувачка за 0,1 процент, додека пораст бележи кај Нетрајни производи за широка потрошувачка за 1,1 отсто.
Во август, во споредба со јули 2024, намалувањето е 6,3 проценти, додека во периодот јануари – август споредено со истиот период од 2023 година, падот изнесува 16,2 отсто.