Реагираше МНР: Формиран Кризен центар за помош на македонските граѓани во Ирак!

Министерството за надворешни работи соопшти дека ја следи безбедносната ситуацијата во Ирак, која е сериозно влошена во последните дваесет и четири часа. „По превземањето на вториот најголем град во Ирак, Мосул, офанзивата на сунитската џихадистичка група Исламска држава во Ирак и Левант (ИСИЛ) продолжува кон Багдад. Препорачуваме македонските државјани да се воздржат од патувања во Ирак, а оние кои веќе се наоѓаат во засегнатите подрачја да ги испитаат можностите за навремено напуштање на земјата“, соопштуваат од МНР. За оваа намена, формиран е Кризен центар кој ќе им стои на располагање на сите македонски граѓани во Ирак. Бројот на Центарот: +389 2 323 3865 Мобилните телефони за дежурство се: 071 253426 и 075 230747 Електронска пошта: krizen.centar@mfa.gov.mk Контактирани се и други држави кои имаат свои претставништва во Багдад и разгледани се можности за соработка при заштита на граѓаните кои се на времен престој во Ирак. За сега нема информации за македонкски државјани кои се соочуваат со опасност во Ирак. Неколкумина српски инженери од институтот „Кирило Савиќ“ се огласија во српските медиуми дека се заробени на 30-тина километри од Багдад, без пари или каква и да е помош од нивната држава. Инженерот Воислав Ќириќ, во изјава за српски „Курир“ вели дека тој и неговите колеги се практично препуштени сами на себе без средства, бидејќи Институтот им должи плати од јануари. А сега гледаат само како да извлечат жива глава од Ирак. „Страшно е! Ни се јавија од амбасадата и не знаат како да ни помогнат, бидејќи Багдад е целосно блокиран. Ни рекоа да се обидеме да стигнеме некако до амбасадата. Но овде е војна во полн ек, па тоа е невозможно. Сосема сме без пари, заработените пари не ги добивме, па немамо доволно ниту за да се јавиме по телефон. Не знам како ќе се извлечеме“, рекол Ќириќ. Б.А.