САМО 26 ОТСТО ОД ЕВРОПЕЈЦИТЕ СЕ ЗА ЧЛЕНСТВО НА МАКЕДОНИЈА ВО БЛОКОТ: Голема е поддршката за Украина пред клучниот Самит

Добивај вести на Viber

Европејците се отворени за пристапување на Украина во ЕУ, покажува истражувањето пред клучниот самит во Брисел кој почнува од утре.

Анкетите, како што објави британски Гардијан, откриваат ладен став кон пристапувањето на Грузија и некои држави од Западен Балкан, како противење на приемот на Турција.

Европејците се генерално отворени за идејата Украина да се приклучи на ЕУ, и покрај трошоците и ризиците, но во најдобар случај се млаки во врска со потенцијалното проширување на блокот што би ја вклучило и Грузија и земјите од Западен Балкан, се наведува во истражувањето.

Европската комисија минатиот месец препорача да започнат официјалните пристапни преговори со Украина и Молдавија. 27-те шефови на влади на ЕУ треба да разговараат за предлогот на самитот во Брисел оваа недела - иако унгарскиот премиер Виктор Орбан постојано изјавува дека се противи на отворање преговори со Киев.

Веќе пдолго време, проширувањето стана итен приоритет на ЕУ откако Русија ја започна својата војна против Украина. Комисијата во ноември, исто така, ги поддржа преговорите за влез со Босна и Херцеговина - откако Сараево ќе биде подготвено - и препорача на Грузија да и се даде статус на земја кандидат.

Украинскиот министер за надворешни работи, Дмитро Кулеба, вчера рече дека би било „погубно“ за Киев и ЕУ доколку самитот не го поддржи почетокот на пристапните преговори. „Не можам да замислам… Не сакам ни да зборувам за последиците“, рече Кулеба.

Анкетата, на шест земји-членки на ЕУ за Европскиот совет за надворешни односи (ЕCFR), покажа значителна поддршка за кандидатурите на Украина и, во помала мера, на Молдавија и Црна Гора, но и длабоки економски и безбедносни грижи.

Сепак, имаше широко спротивставување особено за евентуалното пристапување на Турција, како и значително ладен одговор на изгледите Албанија, Босна, Грузија, Косово, Северна Македонија и Србија да се приклучат на Унијата.

Иако самитот оваа недела ќе се фокусира на патиштата за членство за Украина и другите, дебатата за тоа како точно да се постигне ова „едвај започна“, рече Пјотр Бурас, висок соработник за политиката на ECFR, кој повика на „конкретна временска рамка“ за пристапување.

„Геополитичката реторика од Брисел ја прикрива длабоката загриженост во земјите-членки за потенцијалните последици од проширувањето и широко распространетиот скептицизам за способноста на ЕУ да апсорбира нови членки“, рече Бурас.

Временската рамка ќе обезбеди простор за внатрешни реформи на ЕУ, ќе изгради отпорност и ќе и покаже на јавноста зошто проширувањето е од суштинско значење, изјави Енѓељуше Морина, друг висок соработник на ЕCFR.

Анкетата покажа дека поддршката за влезот на Украина е највисока во Данска (50%) и Полска (47%), со грубо поделено мислење во Романија (32% за, 29% против), Германија (37% за, 39% против) и Франција (29% за, 35% против). Најголем противник е Австрија каде што 52 отсто се против.

Сепак, 45% од испитаниците се загрижени дека пристапувањето на Украина ќе има негативно влијание врз безбедноста на ЕУ, наспроти 25% кои сметаат дека тоа ќе го подобри, додека 39% веруваат дека влезот на Киев негативно ќе влијае на безбедноста на нивната земја.

Многу Европејци не гледаат економска корист од членството на Украина, додека 43% од испитаниците во Полска и 37% во Романија забележале позитивно влијание за економијата на ЕУ, 54% во Данска и 46% во Австрија предвидуваат зголемени трошоци.

Исто така, имаше стравувања за влијанието на проширувањето врз политичката моќ на ЕУ во светот. Полска и Данска беа најоптимисти за ова, со 43% и 35% од граѓаните кои веруваат дека пристапувањето на Украина ќе има позитивно влијание. Меѓутоа, во Австрија (42%) и Германија (32%), најраспространетото мислење беше дека членството на Украина ќе ја намали политичката моќ на ЕУ во светот, додека испитаниците во Франција и Романија беа порамномерно поделени.

ECFR идентификуваше јасна поделба меѓу „старите“ и „новите“ земји-членки на ЕУ во однос на поширокиот принцип на проширување. Испитаниците во Австрија (53%), Германија (50%) и Франција (44%) сметаат дека ЕУ не треба да прима нови членки.

Спротивно на тоа, во Романија мнозинството (51%), а во Полска(48%), веруваат дека ЕУ треба да бара проширување. Во Данска само 37% се против какво било итно проширување.

Истражувањето покажа силно противење на можноста Турција да се приклучи на ЕУ, при што 51 отсто од анкетираните во шесте земји се противат на идејата и помалку од еден од пет испитаници поддржуваат какво било напредно движење за членство на Турција.

Европејците, исто така, се покажаа ладни во однос на Албанија, Босна и Херцеговина, Косово, Грузија, Молдавија, Црна Гора, Северна Македонија и Србија, земји кои имаат помалку од 30% поддршка.

Поддршката за пристапување беше најниска за Косово, (20% за и 37% против) Албанија (24% за, 35% против), Србија (25% за, 35% против) и Грузија (25% за, 31% против).

Мислењето беше порамномерно поделено за Северна Македонија (26% за, 27% против) и Босна и Херцеговина (28% за, 29% против), Молдавија (30% за, 28% против) и Црна Гора (30 % за, 25% против) пристапување во ЕУ.