Се намалува бројот на ЦЕМТ дозволи за постарите камиони
Објавено во: Економија 25 Септември, 2013
Идната година ќе се поделат 1310 годишни ЦЕМТ дозволи за оние возила со еуро 5 категорија. За тие со еуро 6, за првпат се планирани 84 дозволи, соопштија денеска од Министерството за транспорт и врски.
Аплицирање за ЦЕМТ дозволите ќе се прави по интернет, а повикот ќе трае 5 дена, од 10-15 октомври. Право на учество имаат трговските друштва со лиценци за јавен превоз на стоки за сите видови меѓународни транспортни дозволи, но и трговските друштва кои веќе имаат лиценца за превоз на стока за сопствени потреби, за поединечни транспортни дозволи.
„Во последните 12 месеци во Македонија се купени повеќе возила со еуро 5 и еуро 6 стандард и во контакт со дилерите знаеме колку точно ќе пристигнат до 10 октомври. Моментно се лиценцирани 29 возила со еуро 6, а се очекува до 10 октомври да има 84, што значи дека таа категорија ќе биде целосно покриена“, изјави министерот Јанакиески и додаде дека со ова ќе се покријат 65% од возилата со еуро 5 стандард, односно дека годинава 15 проценти помалку превозници ќе добијат ваква дозвола.
Според министерот, тенденција на ЕУ е да се даваат повеќе дозволи за еуро 6, бидејќи новите камиони помалку загадуваат. Во иднина , најави тој, за еуро 5, ќе има уште помалку ЦЕМТ дозволи.
„Некои земји се уште доделуваат дозволи за еуро 4, но бидејќи имаат многу помалку расположливи превозни средства во однос на Македонија“, забележа Јанакиески.
Идто така, на први и втори октомври во Министерството ќе се аплицира за одобрување возни редови за нови линии или промена на возни редови на одобрени линии во меѓуопштинскиот и меѓународниот линиски превоз на патници. И за оваа ставка се аплицира по интернет, а може да учествуваат заинтересирани превозници-правни лица со лиценца за вршење меѓуопштински и меѓународен линиски превоз на патници.