Се релаксираат блокадите на Блаце

Добивај вести на Viber

По најавите за нормализирање на односите меѓу Скопје и Приштина ,  се релаксира и тензичната состојба на Блаце. Од Здружението на транспортери МакамТранс најавија дека ќе ги редуцираат блокадите, односно дека по 30 минути, на секои два часа ќе дозволуваат да се одвива сообраќајот на границата и ќе ги пропуштаат возилата. Како што вели Билјана Муратовска, секретар на МакамТранс за телевизијата Алсат М, целосно укинување на блокадата може да се очекува штом двете влади постигнат договор за укинување на ембаргото за македонските производи, како и за патна такса за косовските жители. „Денеска пуштаме возилата да се движат по половина час на секои два часа со цел да се намали тензијата. Јас се надевам дека политичарите од двете засегнати страни извлекоа добра поука на некој начин и дека конструктивно ќе разговараат и ние целосно да се повлечеме за да можат нормално да функционираат и двете држави“, вели Муратовска. Освена најавите и ветувањата за нормализирање на односите и враќање на соработката меѓу Македонија и Косово, засега официјално нема повлекување на ограничувањата наметнати од двете страни. Кризата на македонско-косовската граница трае веќе осми ден.