Добивај вести на Viber
Мендерес Кучи, Стопанска Комора на Северзападна Македонија:
“Имајќи ги во предвид новите односи и околности меѓу Косово и Србија, само прашање на време е кога ќе се отворат портите, бидејќи и досега се прави трговија преку мала врата. Значи, ќе се отворат портите и бизнисот ќе се реализира таму каде што бил некогаш. Ние од Македонија нашите бизниси ги добивме од губењето на позициите на српскиот бизнис на Косово и ние тоа го компензираме со некои производи кои се произведуваат во нашава земја, а можеби и со производи увезени од Србија, кои потоа се продавани на Косово“, смета Мендерес Кучи од Комората на Севереозападна Македонија.
Борис Анакиев, професор:
“Косово сега се спрема за избори, па може секој долар им е важен и ова со нашава мерка им се најде како оправдување. Исто така можно е да сакаат да чистат терен за на наше место да дојде друга држава, сите опции се во можност, но неблагодарно е ние да погодуваме, треба властите на двете земји да го решат тоа “, изјавува пензионираниот професор Борис Анакиев.
Билјана Муратовска, Макамтранс :
„Колку подолго ќе трае спорот, толку поголеми ќе бидат загубите на превозниците. Покрај нас во загуба се и фирмите за кои го вршиме превозот. Бараме да се седне и да се преговара и да се престане со овие блокади, зашто ние транспортерите сме први кои ги чувствуваме последиците“, вели Билјана Муратовска од Макамтранс, здружение на превозници кое изминативе денови во знак на протест го блокираше Блаце.
Љубица Нури, Стопанска Комора на Македонија:
“Трговските мерки се носат во рамките на некои правила, а оваа мерка е вон сите правила. Очигледно е дека не се работи за мерка која е во рамките на ЦЕФТА, туку е билатерална од страна на Република Косово кон Република Македонија, за разлика од нашата мерка која беше во рамките на Договорот за ЦЕФТА. Мерката не е пријавена ни во ЦЕФТА Секретаријатот во Брисел со што се потврдува дека се третира како билатерална од Косово кон Македонија“, вели Љубица Нури од Стопанската Комора.