Славчо Попоски вели дека топлиот бран продолжува, но ќе има услови за попладневно и вечерно невреме
Објавено во: Македонија 29 Јуни, 2022
Метеорологот Славчо Попоски вели дека топлиот бран продолжува, но ќе има услови за попладневно и вечерно невреме.
Под влијание на многу топла воздушна маса од Африка, уште подолг период времето во Македонија ќе се задржи многу топло и сончево со мала локална облачност и со екстремно висок Ув – индекс кој ќе изнесува коефициент некаде околу 10.
„Сепак во попладневните и во вечерните часови се очекува локален развој на нестабилна облачност, проследена со пороен дожд, грмежи и засилен ветер. Има услови и за локална појава на краткотрајно невреме, проследено со интензивен пороен дожд, силен ветер, силни и чести електрични празнења и со појава на град кој би можел да биде и од поголем пречник. Температурите во следните денови ќе се искачуваат во интервалот од 30 до 38 степени, додека во најтоплите предели истите се очекува да се искачат и до 40 степени“, вели Попоски.
Поради екстремно високата вредност на Ув – индексот, тој препорачува да се заштитите од лошото влијание на сонцето, како и да пиете што повеќе течности. Исто така старите и изнемоштени лица да не излегуваат во најтоплиот дел од денот. Многу топлиот бран барем според моменталните анализи ќе се задржи дури до 10 јули.