Со кампањата „Македонско најдобро“, владата ќе го поттикнува домашното производство

Добивај вести на Viber

Владата предводена од ВМРО-ДПМНЕ во изминатата година покажува вистинска грижа за земјоделците. Реформите и проектите суштински ги решаваат најесенцијалните проблеми и предизвици со кои се соочуваат земјоделците, соопштуваат од владејачката партија.

„По неколку години на застој и уназадување на државата од владеењето на СДС и ДУИ од темел ги менуваме работите. Министерство за земјоделство, шумарство и водостопанство ја започна кампањата „Македонско најдобро: Наша традиција, наша гордост“. Кампањата „Македонско Најдобро“ ќе биде препознатлива по специфично лого кое преку сонцето и почвата не потсетува дека ги имаме сите предуслови за да имаме домашни, квалитетни земјоделски производи“, велат од ВМРО-ДПМНЕ.

Од таму велат дека откако се на власт, расте извозот на земјоделски производи.

„Примарна цел е да се зголеми и зајакне домашното земјоделско производство, да се обезбеди просперитет на руралните средини, да се подигне свеста за квалитетот, автентичноста и значењето на домашните производи и преработки од истите, како и да се обезбеди полесен пристап на нашите сограѓани до домашните земјоделски производи. Споредувајќи ги првите пет месеци од 2024 година со првите пет месеци од 2025 година во делот на извозот бележиме раст над 50 проценти. Во апсолутна бројка тоа е околу 57 милиони евра што е сериозен раст. Растот на извозот на земјоделски производи покажува дека македонското земјоделство се движи во вистинска насока а проектите даваат резултати“, стои во соопштението.

Својата партија ја категоризираат како партнер на земјоделците.

„Македонија извезува повеќе храна од порано. Очекуваме овој тренд да продолжи и Македонија во период од неколку години од увозно зависна земја да стане држава извозник на храна. Владините мерки во секторот земјоделие даваат резултати. Земјоделците конечно имаат партнер во владата предводена од ВМРО-ДПМНЕ. Ја враќаме гордоста кај македонскиот земјоделец. Ги градиме темелите на промените. Доаѓа времето на Македонија“, рекоа од ВМРО-ДПМНЕ.