Сопругата на Миле Јанакиески: Синовите прашуваат каде е

Добивај вести на Viber

Сања Јанакиески, сопругата на Миле Јанакиески, се огласи на социјалните мрежи по повторното притворањето на поранешниот министер за транспорт и врски за новоотворениот случај со државните плацеви, во кое вели дека тој е „дежурен виновник за актуелната власт“ и дека се соочува со неправда.

„Миле го познавам речиси од дете и го знам најдобро од сите. Сме поминале многу. Пријателите ми викаат премногу, дури колку за два живота, а јас ќе кажам премалку зашто за секој поминат ден му благодарам на Бог што сум го запознала. Се секавам на првиот бакнеж во Леоне, па до кавгата за тоа кој е подобар возач и дали лево е вистинското десно, сме се радувале, сме тагувале, сме сакале и ценеле, сме тажеле и гордееле…знам дека на многу ова ќе им звучи патетично, некои ке ме осудат и нема да го одобрат ова, но јас не знам што повеке и не знам како понатаму.

Многу се нашле во ваква или слична ситуација можеби и во потешка незнам, но не секој се одлучува да напише што се случува и како тоа го доживува.

Знам дека многумина имаат секакви предрасуди кон нас и кон мојот сопруг заради различни причини, дезинформации, шпекулации и трачеви што кај нас за жал веке се редовна храна која намерно се нуди, но исто знам дека ова што го пишувам го пишувам од срце и без задршка“, пишува сопругата на Јанакиески, кој една недела е повторно во истражниот затвор Шутка од каде најави дека ќе штрајкува со глад.

Таа додава дека неговите три сина постојано прашувале даке е и кога ќе се врати за повторно да се забавуваат.

„Ова е моето сведоштво за Миле кој јас го знам и причина за мојата лична борба за него …..
Ова што се случува на моето семејство не е правда. Секој што ке се обиде да проанализира подлабоко ке го свати тоа. Не само заради суштината на предметите отворени против Миле туку заради се што всушност се случува околу нас и генерално во државава.
Тој е добар човек со големо срце и секогаш сака да помогне дури и повеке од што може, вреден и исполнителен и она што ке го вети за него е света обврска, оние што го познаваат добро го знаат тоа. Другар и секогаш спремен да излезе во пресрет на било кој проблем било да е семеен, на блиски и не блиски луге. Семејството за него е се, секогаш спремен за изненадувања и организирање секакви лудории со трите сина, секогаш присутен за нив, како поткрепа, како утеха како другар.
И најтешкиот момент следи што да им се објасни и каже на нивното прашање кое денонокно го повторуваат: мамо, каде е тато, кога ке си дојде? Повторно ли ке биде отсутен долго како и минатиот пат? А ке може ли да возиме повторно заедно велосипеди и да одиме на кино? Ке може да излегува нели?“, дополнува сопругата Јанакиески.

И таа мисли дека поранешниот владин функционер штрајкува со глад во притворот и дека најголем пропуст во целата „хајка против него“ е што направил само прекршок во процедурите.

„И да тој штрајкува со глад, веке цела една недела! Бегло беше соопштено ова како и да не е нешто многу важно, зарем не е? Борбата за правда да се води на овој начин, заради тоа што институциите на правдата немаат слух или намерно го изгубиле?

Зарем треба борбата за правда да се сведе на мотото ‘’уапси го Миле”и …и што?! Се прашувам кај се милијоните, не милијардите кои биле украдени?!

Миле го судат само за наводно прекршување на процедури, се друго што ке слушнете е гола пропаганда.

Не барам милост! Јас барам правда!

Стотици прекршувања на процедури, на правила, на човекови права, прават обвинителството и судот.

Ова е изживување и ништо друго!

Секогаш спрема сите се однесувал со почит и емпатија, честопсти не им ги гледа лошите страни на лугето туку пробува да најде оправдување за некого ако погреши. Добриот човек секогаш го гледа доброто во лугето. Никогаш нема лошо кажано за никого.
Едно е тоа што некој ке слушне од 10 одбрани и наменски определени телефонски разговори снимани во 10 години.
Така ако се оценува некој дали е лош или добар човек секој за себе може да каже дека е лош.
А ако се гледа вистинската слика за некого преку цели денови, неговата работа, пријателство, родителство и однесување како сопруг но најмногу како човек, тогаш е нешто сосема друго. Едно е да те портретираат преку кампања, а друго е она што вистински си.“, додава Јанакиески.

Додава дека Јанакиески дури е наивно добар за да посегне по криминал.

„Се плашам дека ако се гледа од 10 тина или 50 тина телефонски разговори снимени во период кога се направени 100 милиони разговори тогаш јас ке кажам за себе дека јас сум лоша, јас знам да опцујам, знам да навредам, да се изнервирам да бидам гневна. Точно е. Некој ке каже ама тој бил функционер и не смеел да збори така, јас ке одговорам тој е само човек. Но верувајте ке повторам тој е добар човек. И секој што го познава лично ке потврди. Дури честопсти како што викаат излегува глуп од што е добар. Да. Грубо звучи но така е. За жал. Тој е едноставно човек. А сега тој човек е жртва на психолошка војна. Неправедна војна кон него бар. За други не знам и не можам да кажам. Верувајте на никого не го посакувам ова што нам ни се случува.

Знам дека вистината еден ден ке излезе на виделина но исто така можам да кажам дека не сум убедена дека Миле ке ја дочека здрав и читав.

Не се разбирам во политика. Не сум ја следела ниту ја сакам. Тоа е најпрљавата работа на свет според мене.
Но политиката нема да се исчисти ако се изживуваш со Миле“, пишува Сања Јанакиески.