Спасовски: Полицијата професионално ќе си ја врши работата утре на протест

Добивај вести на Viber

За утрешниот собир на „Шарената револуција“ за поддршка на Специјалното јавно обвинителство, министерот за внатрешни работи Оливер Спасовски вели дека полицијата професионално ќе си ја врши работата.

Додава дека без оглед кој протестира, полицијата треба да го одржува јавниот ред и мир и нормално треба да се почитува правото на протест. 

„Јас очекувам дека професионално и до крај посветено ќе си одговорат на задачата сите професионални во МВР кои ќе бидат на обезбедување на овој протест“- кажа Спасовски.

Од „Шарената револуција“ на нивниот фејсбук профил најавија собир за в понеделник, во 17 часот пред Собранието  за поддршка на СЈО.

Тие велат дека од одредени медиуми се врши линч врз СЈО. 

„Истовремено, власта, со која се уште управува обвинетиот Груевски, ја користи секоја прилика за да ја блокира работата на оваа институција. Судиите од тефтерот на Горде продолжуваат да ги одбиваат барањата за притвор, го укинаа единственото кое беше прифатено и го вратија едниот обвинителен предлог што СЈО го поднесе до кривичното одделение, поради причина која не им е проблем кога постапуваат по предметите на Зврлевски“ - пишува меѓу другото на Фејсбук профилот на „Шарена револуција“.

Од „Шарена револуција“ истакнаа дека на СЈО му е потребна помош.