Добивај вести на Viber
Студентската организација „Студентски отпор“ синоќа објави дека не се согласува со новите правила кои се воведуваат за студентскиот субвенциониран оброк и дека со денешната инфлација не може да се купи оброк за 140 денари, лимитот кој секој ден ќе го добиваат студентите.
„Како движење Студентски Отпор кое е секогаш на страната на студентите не се согласуваме со новиот начин на исплата на субвенционираниот студентски оброк поради неколку причини:
- На еден месец пред почетокот на академската година, се уште не е утврдено на кој начин, на кои места и во кое време ќе може да се користат средствата?
- Како што и претходно баравме, така и овој пат, сметаме дека согласно инфлацијата 140 денари дневно е мала сума за еден квалитетен оброк.
-Според предвиденото оброкот ќе може да го користиме само со картичка, а голем дел од угостителските објекти кои се наоѓаат во близина на кампусот на УКИМ не поседуваат терминали за плаќање со картички.
-Водени од искуството од претходните години каде што МОН доцнеа на месечно ниво со исплата на средствата, имаме сомнежи дека сега ќе успеат на дневно ниво да ги испраќаат средствата“, се сомневаат од „Студентски отпор“.
Од таму бараат средствата да се испраќаат на неделно или месечно ниво и не се согласуваат со одлуката средствата да не можат да се искористат следниот ден ако не се искористени истиот ден кога се префрлени.