ТАМУ ИМА ОКОЛУ 200 ПАЦИЕНТИ: Болницата во Кан Јунис повеќе не работи
Објавено во: Свет 18 Февруари, 2024
Болницата Насер во Кан Јунис, по израелската воена опсада, повеќе не работи.
Во таа болница има уште околу 200 пациенти, а најмалку 20 од нив мора итно да бидат препратени во други болници за да добијат соодветна здравствена заштита бидејќи, медицинската нега е право на секој пациент, пренесува палестинската агенција Вафа.
Генералниот директор на Светската здравствена организација (СЗО), Тедрос Аданом Гебрејесус денеска изјави дека болницата Насер во Кан Јунис, најголемата на југот на Појасот Газа, повеќе не работи по еднонеделната опсада.
„Вчера и завчера на тимот на СЗО не му беше дозволено да влезе во болницата за да ја процени состојбата на пациентите и критичните медицински потреби, и покрај тоа што стигна до болничкиот комплекс за да испорача гориво заедно со партнерите“, објави Гебрејесус на платформата „Икс“.
Шефот за надворешна политика на ЕУ Жозеп Борел денеска ја повика израелската влада да не презема воени дејствија врз градот Рафах во јужниот дел на Газа, каде што над 1 милион Палестинци побараа засолниште од немилосрдните напади на Тел Авив.
Израелската армија денеска соопшти дека убила десетици палестински борци и запленила значителен број оружја за време на борбите низ Појасот Газа во изминатите 24 часа.
Палестинската терористичка група Хамас на 7 октомври лани изврши напади на Израел. Бараат формирање на независна држава Палестина со главен град Ерусалим, но и пуштање на палестинските затвореници.