Тивка смрт на уште еден југословенски гигант: По 65 години згасна фабриката што хранеше стотици семејства

Добивај вести на Viber

По 65 години работа, последната ролна хартија со натпис „4 ноември 2025, Белишќе“ означи крај на фабриката што некогаш беше симбол на индустриската моќ на Југославија и гордост на Хрватска. Работниците се простија со емотивна порака, а историјата на Комбинат Белишќе од денес останува само во спомени и архиви.

Фабриката за хартија, која функционираше во рамки на британската компанија DS Smith, а неодамна беше преземена од американскиот гигант International Paper, минатата недела го запре производството. Судбината на околу 200 работници се решаваше во преговори со синдикатите, додека фабриката за амбалажа во Белишќе продолжува со работа.

Според Хрватската техничка енциклопедија, Комбинат Белишќе во 80-тите бил еден од најголемите комплекси за преработка на дрво во поранешна СФРЈ, со најголеми капацитети за полуцелулозни влакна во државата и меѓу најголемите во Европа. Во 1984 година произведувал над 99.000 тони полуцелулоза и 165.000 тони амбалажен хартија, од кои голем дел бил наменет за извоз.

Во своето златно време имал околу 3.000 работници и производство што опфаќало хартија, амбалажа, дрво, пластика, тракторски приколки и широк спектар други производи. Но по 2000 година следуваше континуиран пад: намалување на бројот на вработени, преземања од австриски и британски компании, затворање на погони и сè поголеми финансиски загуби.

DS Smith Belišće само во последните две години има акумулирано загуба од 36 милиони евра, а денес бројот на работници е намален на 340.

Истовремено, копривничкиот Bilokalnik – фабрика основана истата година како и Белишќе – од некогашни 5.000 вработени денес опстојува со само 150.

Гаснењето на фабриката во Белишќе е уште еден доказ за тоа како регионалните индустриски гиганти, некогаш столбови на економијата, тивко исчезнуваат, оставајќи зад себе празни хали, изгубени работни места и цела една ера на производство што никогаш нема да се врати.