Добивај вести на Viber
Треба да се интензивира економска соработка меќу Македонија и Полска, по 20 години од воспоставување на дипломатските односи меѓу двете земји. Ова на бизнис-форумот од Скопје го побараа македонскиот и полскиот претседател, Ѓорге Иванов и Бронислав Комороски. Бизнис-делегација составена од најголемите полски компании од повеќе индустрии: металургија, одбрана, градежништво, прехранбена индустрија и производство на мебел, пристигна во земјава за да види какви можности нуди Македонија. За време на форумот се одржаа средби помеѓу македонските и полските компании и беа остварени значајни директни контакти како предуслов за деловна соработка.
Како што истакна македонскиот претседател Иванов, Полска е важен трговски партнер на Македонија и во 2012 година беше на листата со 20 земји со кои остваруваме најголем обем на трговска размена. Сепак, забележа тој,во првите шест месеци од 2013 година оваа размена бележи пад.
„Полска е важен трговски партнер на Македонија, но во последните шест месеци од годинава резултатите не се задоволувачки. Затоа и денеска сме овде, да дадеме нов елан на соработката меѓу двете земји,“ изјави претседателот Иванов.
Со него се согласи и полскиот колега Комороски, кој во обраќањето пред бизнисмените рече дека иако двете земји немаат отворени прашања, треба да се интензивира бизнис-соработката.
Нешто подоцна на работен ручек полскиот претседател имаше средба и со македонскиот премиер Никола Груевски, каде повторно беа поздравени традиционално добрите и пријателски односи. Груевски истакнал дека Македонија е заинтересирана за поголема економска соработка со Полска и за можностите за раздвижување на инвестициските активности меѓу двете држави. Според премиерот, овде има големи предности и поволности за компаниите кои се решат да инвестираат во некоја од трговски индустриско- развојните зони, како и поволни даночни пакети, намалените административни процедури за водење на бизнис и можноста за ползување на бенефитите од компетитивна работна сила.
Претседателот на Полска Коморовски пак истакна дека Република Полска е искрен пријател на Република Македонија и силен поддржувач на нејзините интеграциски напори и процеси.