Трипуновски: Струмица не инвестирала во филтер станицата, затоа нема вода за пиење
Објавено во: Македонија 26 Октомври, 2024
Водата од струмичкиот водоснабдителен систем еден месец е забранета за пиење, иако градоначалникот Костадин Костадинов тврди дека таа е исправна и во хемиско-физичкиот состав и микробиолошки. Забраната од Агенцијата за храна и ветеринарство за пиење на водата останува во сила поради присуство на колиформни бактерии.
Денеска за прв пат се огласи и министерот за земјоделство, Цветан Трипуновски, кој причината за ваквата забрана ја гледа во тоа што не се вложувало во модернизација на пречистителната станица и во тоа што, како што изјави за Телма, општината слабо го менаџирала процесот
- Гледаме дека локалната самоуправа слабо го менаџираше процесот, тоа што градоначалникот не инвестирал во филтер станицата говори за нивната работа. Ако се неспособни, нека кажат, ние ќе помогнеме како Влада, за тие 40.000 жители да не го живеат ова денес, рече Трипуновски.
Додека уште не е стигната официјална потврда од АХВ со што ќе се укине решението за забрана за пиење на вода, градоначалникот Костадинов за Трипуновски рече дека се криел за целиот проблем.
- Истиот тој министер не се појави и не собра храброст да излезе пред струмичани да ги каже бројките и анализите и да каже што е причината за појавата на манган, реагираше Костадинов и побара во Собранието да се поведе постапка за интерпелација кон овој министер.