УБИЕНИ СЕ ДОДЕКА ЧЕКАА ХРАНА: Загинаа над 100 Палестинци во Газа

Добивај вести на Viber

Преку 100 Палестинци загинаа во Газа во еден напад. Додека чекаа хуманитарна помош, убиени се најмалку 104 лица, а 760 се повредени.

Жртвите чекале хуманитарна помош во близина на Довар ал-Наблус. Портпаролот на палестинското Министерство за здравство во Газа, Ашраф ал-Кудра изјави дека повредените се префрлени во болниците во северниот дел на појасот Газа. Израелските војници пукале и кон медицинските тимови и цивили кои им помагале на повредените.

Инцидентот почнал околу четири часот наутро, кога триесетина камиони со хуманитарна помош пристигнале на брегот на градот Газа, за да достават храна до Палестинците. Илјадници Палестинци ги опколиле камионите откако го поминале контролниот пункт на израелските безбедносни сили (ИДФ) во центарот на Газа, што довело до стампедо.

Високиот член на Хамас, Изат Ал-Ришек предупреди дека убиството на луѓето кои чекале помош може да доведе до неуспех на тековните разговори, кои имаат за цел ослободување на заложниците и прекин на огнот.

Властите во Газа велат дека 13.230 деца загинале во опколената крајбрежна енклава, вклучително и седум кои умреле од глад. Бројот на загинати вклучува и 8.860 жени, 340 медицински персонал, 132 новинари и 47 вработени во цивилната одбрана. Претходните денови беше објавено дека неколку деца починале од неухранетост. 

Хамас лани на 7 октомври го нападна Израел, а војната уште трае. Палестинската група сака да формира независна држава Палестина со главен град Ерусалим, а Израел сака да ја уништи терористичката група.