Урко кренал слушалка, ќе сведочи во „Тенк“
Објавено во: Македонија 25 Април, 2018
Одбраната за денешното рочиште за случајот „Тенк“ како сведок го обезбеди Дејан Митревски – Урко, шеф на обезбедувањето на тогашниот премиер Никола Груевски, кој не се појави на претходното рочиште откако не се јавил на телефонскиот повик.
За набавката на „мерцедесот“ од 600.000 евра ќе сведочат и двајца вештаци, Тале Герамитчиоски и Страхил Глигоровски.
На претходното рочиште сведочеа осум сведоци предложени од одбраната, кои посочија дека набавката на новиот „мерцедес“ била неопходна, бидејќи старото возило често останувало во дефект и не било безбедно за превоз на важни личности.
Во случајот „Тенк“ обвинети се поранешниот премиер Никола Груевски, поранешната министерката за внатрешни работи, Гордана Јанкулоска и поранешниот помошник министер во МВР, Ѓоко Поповски. Пред две рочишта, судот донесе одлука да ја раздвои постапката за Јанкулоска поради тоа што таа имала ризична бременост.