„ВЕТУВАМ, ПРОТОКОЛОТ ЌЕ ГО ОБЈАВИМЕ ПРЕД ДА СТАВИМЕ ПОТПИС“: Протестот продолжува пред Собранието

Добивај вести на Viber

Министрот за надворешни работи Бујар Османи изјави дека протоколот со Бугарија ќе го објават пред да го потпишат, нагласувајќи дека во документот нема ништо спорно.

„Ветувам, протоколот ќе го објавиме пред да ставиме потпис. Тие не се задоволни, затоа што треба да признаат македонски јазик, официјално во Европската унија. Тие не се задоволни што нема поглавја, што нема одредници… единствено што добија е промена на Уставот за да бидат внесени Бугарите. Ништо повеќе нема во францускиот предлог како компромис, освен тоа“, истакна министерот Османи.

Тој денеска имаше средба со Претседателката на Европската Комисија, Урсула фон дер Лајен, на самиот старт на нејзината посета на Скопје.

 Изразувајќи благодарност за оваа посета, Османи подвлече дека Европската комисија отсекогаш била докажан партнер на патот на евроинтегративен пат на земјава, стриктно и објективно анализирајќи ги состојбите и остварениот напредок преточен во извештаите за напредокот на државата. Оваа поддршка ќе продолжи и понатаму со официјалното отворање на пристапните преговори низ процесот на скрининг.

 „Оваа посета доаѓа во вистинско време, при самото заокружување на широкиот консултативен процес за предлогот на Француското претседателство и вашето денешното обраќање во Собранието го сметаме за значаен придонес во овој процес и поддршка за продолжување на нашите европски интеграции“ - истакна Османи, потсетувајќи дека е втор пат во нашата историја, Претседател на Европската Комисија да се обрати во нашето Собрание. Првиот пат Романо Проди, на самиот старт на нашиот евроинтегративен пат, по повод потпишувањето на Спогодбата за Стабилизација и Асоцијација, и сега на самиот старт на преговорите, како финална фаза пред нашето полноправно членство во Унијата.